Kahilom.
Nakapahimong posible sa pagtumaw nga madungog ang tingog.
Dili mahimong balihon.
Nga sa daw nalusaw, nahanaw bisan ang nag-aling bungbong.
Gawasnon nang molupad kay unsa mang sampong namahimong inbisibol.
Mamahimong kanunay’ng gipangita.
Apan bantay ka kung siya nay motungha.
Madungog mo ang mga tingog nga kanhi natabunan o di kaha basta na lang sa kalit mangbulagta.
Walay hinungdan.
Tingali ang rason bunga na sa imahinasyon.
Daghang ispikulasyon, panagna, tipu-tipo, sibo-sibo, panaglapat sa unsa may kanhing hikit-ang naandan.
Mopabunga sa nagkadaiyang reaksyon.
Pag-alingasa kay tingali dili hisakpan unsay buot ipasabot.
Dili manumbaling kay kapoy ra kay mora mag nagkalot nga walay paingnan nan usik sa higayon.
Mamalikas kay ingog samukan kay daw nangita ra man ni’g atensyon.
O di kaha magpakitabang dayon hunghong, sugpon kay kuno aduna sab gitaguang habak ug listahan sa orasyon.
Mobahakbak ba kaha dayo’g ingon “sa nakasabot, mahimuot.”
Unsay punto?
Pinasuko kunohay’ng pangutana, tonadang pakonsensiya, yamyam sa kaugalingon: ang pagsuwat ba “luxury” na niining kahimtanga?
Pagkadaghang gipatumaw ug gihagit kining pandemya.
Anaa ang dakong kahinam nga i-normalize ug ikahon bisan ang wala damhang panagtagbo, pangalanan ang dili makita ug hukman ang dili mopaigo sa panaksan.
Hinaut anaa ang tinuod nga kalingkawasan dili lamang gikan nianang “cheap grace” kundi gikan usab nianang makapungang “cheap answers.”
